الطيب فرصه والجمايل توافيق

الطيب فرصه والجمايل توافيق
ومن لاتوفق ماكتب له جماله
ومن لارقى للطيب روس الشواهيق
ومازان له وقته على ما بداله
ومادام لفعول الجمايل عشاشيق
كسب الجمايل مايجي بالسهاله
ولوانها تشرب مع فكة الريق
كلن خذاله كل ما أصبح بياله
والطيب منوه للقلوب المشافيق
كلن يتوق ومنوته راس ماله
والمدح مايزهي على الرجل ويليق
الا ليا صارت وافيات خصاله
يستاهله رجلن يفك المزانيق
اللي يقال ونعم لاجى مجاله
ومن ساقته نفسه وهو مابعد سيق
لأجل الجميل يزين الله فاله
والمرجله ماهي بتحتاج تنسيق
من بين قلب اللي عشقها وباله
ومن عادة الدنيا تخون المواثيق
تفتر مكرتها سوات المحاله
ولولا اللوازم ماعرفنا المخاليق
مانعرف الرجال لين انعنى له
والكفؤ تظهر فزعته حزة الضيق
وينشاف في الشده بعين العداله
نسل الرجال متعبين الملاحيق
متوسطن من بين عمه وخاله
واللي يطيق ولابغى قال ما أطيق
تحرم عليه المرجله والشكاله
والهينه تكبر على اللاش والهيق
له في الرخا قاله وفي الضيق قاله
والطيب شاره والضماير صناديق
واللاش طيبه ما تعدى ظلاله
وأنا أسبر قلوب الرجال المغاليق
والصامت أقطع غايته من مقاله
ومادام في الدنيا رجال ومطاليق
نصيتهم واللاش مالي وماله

ياهلا وغلا


اسعدني مرورك

مشكووور

الغفوووووووو